Կուբայում մեկնարկել է UAZ ամենագնացների արտադրությունը։ Patriot-ի առաջին փորձնական մոդելը հավաքվել է կուբայական EISA ընկերության գործարանում: Սա դեռ լիարժեք գործարկում չէ, բայց վաճառքի համար նախատեսված ամենագնացները Հավանայում կսկսեն արտադրվել «շատ մոտ ապագայում»։
Կուբայի մայրաքաղաքի EISA գործարանում ավարտվել է արտադրական գիծը, և ներկայումս ընթանում է սարքավորումների վերջնական ճշգրտումը: Patriot-ի առաջին օրինակը հավաքվել է արտադրության տեխնոլոգիան փորձարկելու և համակարգերը կառավարելու համար։ UAZ-ը հաստատել է, որ հավաքումը սկսվել է և վստահեցրել, որ մոտ ապագայում կսկսվի լայնածավալ արտադրություն։
Ամենագնացները կհավաքվեն Ռուսաստանից ներկրված բաղադրիչների հավաքման մեթոդով:
Բացի Patriot-ից, Կուբան նախատեսում է արտադրել UAZ Pickup: Ավելի վաղ հաղորդվում էր, որ կուբացիներին առաջին հերթին հետաքրքրում է «Բուխանկան», որը կարող է վերածվել շտապօգնության մեքենայի։ Երկիրը նախատեսում է նաև տեղակայել սպասարկման կենտրոնների ցանց՝ UAZ-ների վերանորոգման և սպասարկման համար:
