Toyota-ն սկսել է արտադրել Land Cruiser ամենագնացը դեռ 1951 թվականին: Ներկա սերնդի մոդելը՝ Land Cruiser 300-ը, ներկայացվել է 2021 թվականի հունիսին: Մինչ այժմ ճապոնական արտադրողը դեռ չի պատրաստվում ամբողջությամբ թարմացնել այն, սակայն որոշ փոփոխություններ արդեն առկա են ներքին շուկայի տարբերակում:
Թարմացված Toyota Land Cruiser 300-ի արտաքին տեսքը և ինտերիերի ձևավորումը չեն փոփոխվել: Այնուամենայնիվ, փոփոխություններ կան սրահում, որոնք վերաբերում են էլեկտրոնիկային: Այսպես, բազային տարբերակը այժմ ներառում է յոթ դյույմանոց էկրանով սարքավորումների վահանակ (նախորդ մոդելում այն եղել է 4,2 դյույմ, իսկ ավելի մեծ տարբերակը հասանելի էր որպես հավելյալ տարբերակ): Միջին և բարձր մակարդակի տարբերակներին հասանելի է 12,3 դյույմանոց վիրտուալ վահանակ:
Թարմացվել է նաև տեղեկատվական-ժամանցային համակարգը. բազային տարբերակներում այժմ տեղադրված է ութ դյույմանոց սենսորային էկրան, որը փոխարինել է նախկինում առաջարկվող յոթ և ինը դյույմանոց հնացած տարբերակներին: Ավելի թանկ մոդելները դեռևս համալրված են նույն 12,3 դյույմանոց հորիզոնական ձգված էկրանով, ինչպես նախկինում:
Բացի այդ, թարմացումների ցանկում ավելացվել է նաև գործարանային վիդեոռեգիստրատորը, որը ներառված է այժմ Toyota Land Cruiser 300-ի հիմնական կոմպլեկտացիայում: Ավելին, թարմացված ամենագնացը ստացել է բարելավված ավտոմատ արգելակման համակարգ, որն այժմ ավելի լավ է ճանաչում հեծանվորդներին ճանապարհին:
Թարմացված ամենագնացը ստացել է նաև հավելյալ պաշտպանություն գողությունից. Մասնավորապես, ավելացվել է սմարթ բանալու լոկացիայի ստուգումը մեքենայի շարժիչի գործարկումից առաջ, ինչպես նաև բոլոր մոդելների տարբերակներում այժմ առկա է մատնահետքերի սկաներ շարժիչի գործարկման կոճակի վրա: Բացի այդ, գործարանային ազդանշանային համակարգը համալրվել է թեքության սենսորով:
Land Cruiser 300-ը նաև ստացել է My Car Start Lock ֆունկցիան, որի միջոցով սեփականատերը կարող է հեռակառավարման միջոցով (բջջային հավելվածով) անջատել շարժիչը: Հարկ է նշել, որ այս նորարարությունները կարևորվել են այն պատճառով, որ նախկինում հայտնի դարձավ, որ Land Cruiser-ը Ճապոնիայում ամենաշատ գողացվող մեքենաներից մեկն է:
Ներքին շուկայում լիաքարշակ Toyota Land Cruiser 300-ը առաջարկվում է կամ 307 ձիաուժ հզորությամբ 3,3 լիտրանոց V6 տուրբոդիզելային շարժիչով (առավելագույն պտտող մոմենտը՝ 700 Նմ), կամ 415 ձիաուժ հզորությամբ 3,4 լիտրանոց բենզինային կրկնակի տուրբո շարժիչով (650 Նմ): Երկու շարժիչն էլ աշխատում են տասը աստիճան ունեցող ավտոմատ փոխանցումատուփով:
Թարմացված Toyota Land Cruiser 300-ի մեկնարկային գինը կազմում է 5 252 500 իեն (մոտ $34 886 ընթացիկ փոխարժեքով), իսկ լավագույն մոդելի գինը սկսվում է 8 136 700 իենից (մոտ $54 056): Ի դեպ, Ճապոնիայում Toyota-ի պաշտոնական կայքում նշվում է, որ ընկերությունը արդեն ձևակերպել է բազմաթիվ նախնական պատվերներ թարմացված մոդելի համար, ուստի ներկայումս պատվերների ընդունումը դադարեցվել է:
