General Motors կորպորացիան նույնպես քաղում է էլեկտրական մեքենաների վաճառքի նկատմամբ չափազանցված լավատեսության դառը պտուղները․ GM-ի ամենաթանկ ու ամենահզոր մարտկոցով պիկապներն ու ամենագնացները վատ են վաճառվում, այդ պատճառով Դետրոյթում գտնվող Factory Zero գործարանը, որտեղ դրանք արտադրվում են, ժամանակավորապես անցնում է կրճատված աշխատանքային գրաֆիկի։
GMC Hummer EV-ի դեբյուտը եղավ 2020 թվականին՝ պիկապի թափքով, արտադրությունը սկսվեց 2021-ին, իսկ նույն տարում ներկայացվեց նաև GMC Hummer EV ամենագնացը։ 2021 թվականին GMC Hummer EV-ի շուրջ մեծ աժիոտաժ կար, նախ այն պատճառով, որ լեգենդար Hummer-ը վերադարձավ, բայց նաև նրա տպավորիչ տեխնիկական հատկանիշների պատճառով։ Իհարկե, դիզայնն էլ իր ազդեցությունն ունեցավ․ ինչպես կասեր դասականը՝ «ծանր, կոպիտ, տեսանելի»։
Եթե այն ժամանակ Factory Zero գործարանը անմիջապես արտադրեր մոտ քսան հազար մարտկոցով Hummer, ապա, ամենայն հավանականությամբ, դրանք առանց խնդիրների կվաճառվեին՝ չնայած ավելի քան 100 000 դոլար արժողությանը։ Բայց 2021 թվականին դեռևս կորոնավիրուսի ժամանակներ էին, բաղադրիչների դեֆիցիտ ու այլ բարդություններ կային, ուստի արտադրության ծավալները երկար ժամանակով դանդաղ էին աճում։ Իսկ երբ գործարանն սկսեց աշխատել լիարժեք հզորությամբ, պարզվեց, որ էլեկտրական Hummer-ները շուկային այնքան էլ պետք չեն։ 2023 թվականին սկսվեց էլեկտրամոբիլների պահանջարկի գլոբալ դանդաղում, իսկ այս տարվա սկզբին ԱՄՆ նախագահի պաշտոնը ստանձնեց Դոնալդ Թրամփը, ինչից հետո «կանաչ» օրակարգը երկրորդ պլան մղվեց։
Առաջին ամբողջական վաճառքի տարում՝ 2022-ին, ԱՄՆ-ում վաճառվեց ընդամենը 854 հատ GMC Hummer EV, 2023-ին՝ 3244 հատ, 2024-ին՝ 13 993 հատ, իսկ այս տարվա առաջին կեսին՝ 7987 հատ (+73,7%՝ նախորդ տարվա նույն ժամանակահատվածի համեմատությամբ)։ Թվում է թե աճ կա, ինչի՞ համար դժգոհել։ Բայց խնդիրը այն է, որ GM-ի ղեկավարությունը նախատեսում էր շատ ավելի մեծ ծավալներ, իսկ այժմ պահեստները արդեն լցված են չվաճառված Hummer-ներով, ուստի եկել է պահը արտադրությունը դանդաղեցնելու։ Detroit Free Press թերթի տվյալներով՝ սեպտեմբերի 2-ից հոկտեմբերի 5-ը Factory Zero գործարանը կկրճատի GMC Hummer EV-ի արտադրությունը առաջին և երկրորդ հերթափոխերում և այդ ժամանակահատվածում «ավելորդ» աշխատողներին տուն կուղարկի՝ մասամբ պահպանելով նրանց աշխատավարձը։
Արտադրության կրճատումը կվերաբերի նաև վատ վաճառվող էլեկտրական Cadillac Escalade IQ-ին, որը ներկայացվեց 2023 թվականին և շուկա մտավ 2024-ին․ այդ ժամանակ վաճառվել էր ընդամենը 670 հատ մեքենա, իսկ այս տարվա հունվար-հունիս ամիսներին՝ 3766 հատ։ Համեմատության համար՝ նշենք, որ բենզինով Escalade-ը միայն այս տարվա առաջին կեսին ԱՄՆ-ում վաճառվել է 24 375 հատ (+26,9%)։
Factory Zero գործարանը արտադրում է նաև մեծ էլեկտրական պիկապներ Chevrolet Silverado EV և GMC Sierra EV․ դրանք կառուցված են GM BT1 հարթակի վրա, նույն հարթակի, ինչի վրա հիմնված են Cadillac Escalade IQ-ն և GMC Hummer EV-ն։ Այս պիկապները նույնպես առանձնապես լավ չեն վաճառվում․ Chevrolet Silverado EV-ն այս տարվա առաջին կեսին վաճառվել է 5439 հատ, GMC Sierra EV-ն՝ 2773 հատ։ Բայց կարևորն այն է, որ Factory Zero գործարանը այս տարի արդեն երկրորդ անգամ է կրճատում աշխատանքային գրաֆիկը․ նախորդ՝ գարնանային փոփոխությունները նույնպես վերաբերում էին այս մոդելներին։
Ավելացնենք նաև, որ Ford ընկերությունը իր էլեկտրական պիկապ F-150 Lightning-ի արտադրության կրճատումը սկսել էր դեռևս 2023 թվականին, իսկ Tesla Cybertruck պիկապը նույնպես վատ է վաճառվում, և նրա արտադրությունը ևս կրճատվել է այս տարվա սկզբին։
